O Bar Cruceiro de Monforte repetirá a ‘búsqueda do décimo’

Tras o éxito do pasado Nadal, anuncian xa a posta en marcha do xogo que convida a buscar décimos de lotería escondidos polo barrio de San Antonio. Aqueles que os atopen poderán quedar con eles.

Laura ensinando os décimos en xogo. Foto: Bar Cruceiro

Laura Álvarez, titular do Bar Cruceiro e da Administración de Lotería que hai no mesmo local, deu moito que falar o pasado ano grazas a unha iniciativa que tivo para animar á xente ás portas do Nadal. Decidiu esconder varios décimos de lotería en recunchos insospeitados do barrio de San Antonio, onde se ubica a administración, e convidou a buscalos. A recompensa, quedar co décimo atopado en propiedade para poder xogalo no sorteo do 22 de decembro.

Pois ben, tal foi o éxito daquela acción que este ano Laura decidiu repetir o xogo. A “II busca do décimo” será os días 17, 18 e 19 de decembro, abríndose a veda para empezar a buscar o venres 17 pola tarde.

Bar Cruceiro, no barrio de San Antonio de Monforte / XdL

Nesta ocasión serán directamente dez os décimos agochados e, como no ano anterior, o que se esconderá será un vale que estará dentro dun sobre de plástico e será canxeable polo décimo orixinal no punto de venda –Bar Cruceiro–.

Só se fará entrega de décimos a maiores de 18 anos e un por persoa. O número escollido é o 98.681 e os boletos son “décimos azuis”.

Para rematar, Laura dinos que está confeccionando as pistas para dar cos escondites e lémbranos que irá dando detalles nas súas redes sociais. Así mesmo, cando comece o xogo tamén haberá que estar pendentes da información que se poña na porta do local coas indicacións pertinentes.

DEIXAR UN COMENTARIO

Please enter your comment!
Please enter your name here