A intervención no Pazo de Tor desenvólvese no marco do proxecto “Soterradas. A vida tralos mantelos, da fortaleza ao Pazo”, que busca incorporar a perspectiva de xénero e social ao discurso museográfico.
A actuación recupera para o percorrido visitable do Pazo de Tor sete estancias: tres cuartos, un aseo, unha zona de ferramentas e un tear, no soto do edificio, e a vivenda de Ángeles Rivada, que comezou a traballar no servizo no 1959, con nove anos, e que permaneceu no Pazo ata a xubilación, mesmo despois de que a propiedade fose cedida á Deputación de Lugo -a súa continuidade figuraba como condición na doazón-.
Ata agora, a visita ao Pazo de Tor limitábase as salas e dependencias ocupadas pola nobreza, que conservan o mobiliario e as coleccións artísticas que a linaxe dos Garza, a quen pertenceu, foi atesourando ao longo dos séculos, ofrecendo un testemuño privilexiada do modo de vida da nobreza na Galiza da Idade Moderna.
Coa recuperación e posta en valor destes novos espazos, respectando a distribución e estrutura orixinal, e incorporando obxectos que formaban parte da vida cotiá das presoas que os habitaron, o Pazo de Tor visibiliza relatos esquecidos ou ignorados na construción do discurso museográfico, en detrimento, sobre todo, do recoñecemento do traballo das mulleres, maioría entre o persoal de servizo.
Na representación desa memoria oculta, teñen especial relevancia os mantelos, unha prenda presente en diferentes puntos do percorrido como símbolo da distinción de clase entre as mulleres das fortalezas e pazos.
A xerente da Rede Museística Provincial e coordinadora do proxecto Soterradas, Encarna Lago, explicou que “a recuperación destes espazos é froito do traballo de investigación, conservación, difusión e actividade didáctica realizado nos últimos tres anos no territorio” e sinalou esta “incorporación de novos espazos e novas narrativas como un cambio radical no ADN do museo, noque se ofrece agora unha visión completa do que aconteceu, de arriba abaixo e de abaixo arriba”.
A visita guiada por estes novos espazos deu inicio a segunda edición das Xornadas Pacegas, que se desenvolven ata este xoves baixo o mesmo epígrafe que o proxecto de renovación museolóxica “Soterradas. A vida tralos mantelos, da fortaleza ao Pazo”.
