O alumnado do CEIP San Clodio, do CEIP de Quiroga e do CPI Uxío Novoneyra de Folgoso do Courel veñen de participar nun obradoiro de pasatempos da man da escritora e docente Celia Díaz Núñez. Durante a sesión, os nenos e nenas traballaron con diferentes tipos de xogos de palabras, co obxectivo de aprender, pensar e divertirse en galego. Ao longo da actividade elaboráronse tres tipos de pasatempos: sete sopas de letras, sete cruzadas e un encrucillado colectivo, no que participou o conxunto do alumnado.
Esta actividade enmárcase dentro das accións de promoción e normalización da lingua galega que se están a desenvolver conxuntamente os concellos que conforman o Xeoparque Montañas do Courel. Conta, ademais, co financiamento da Consellería de Lingua, Cultura e Xuventude e está destinada ao fomento do uso do galego nos concellos de Ribas de Sil, Quiroga e Folgoso do Courel.
Desde os tres concellos agraden a colaboración dos colexios e de Celia Díaz para achegar aos máis pequenos propostas que permiten xogar, crear e aprender na nosa lingua.
Luis Fernández, concelleiro de cultura de Ribas de Sil e coordinador da actividade xunto cos concelleiros responsables nos outros concellos participantes, comentan que: “Con este tipo de propostas búscase ofrecer ao alumnado ferramentas lúdicas que lles permitan familiarizarse co galego desde idades temperás, combinando a aprendizaxe co xogo e a creatividade”.
