Xornadas en Monforte o 24 de maio e o 3 de xuño sobre as axudas para turismo e comercio

A Xunta e a Confederación de Empresarios de Lugo (CEL) desenvolverán en Monforte de Lemos unhas xornadas informativas sobre os apoios aos que poden optar as pemes dos sectores do turismo e o comercio.

xornadas Monforte Conecta / Delegación Territorial

A iniciativa enmárcase na programación da oficina Conecta Lugo, que recentemente puxeron en marcha ambas entidades de forma conxunta nun local do edificio da estación de autobuses de Monforte.

O obxectivo é achegarse aos emprendedores e empresarios da zona sur para ofrecer asesoramento personalizado, especialmente no que atinxe á innovación, co foco posto naquelas con potencial pero que aínda non deron o paso. Tamén se desenvolven actividades divulgativas, visitas a empresas e foros sectoriais.

Neste contexto, este martes día 24, ás 17 horas, a xefa da Área Provincial de Turismo da Xunta en Lugo, Paloma Vázquez, presentará as axudas e liñas de apoio orientadas á hostalería; e o venres 3 de xuño ás 16.00 horas, o director xeral de Comercio e Consumo, Manuel Heredia, informará dos apoios a este sector. Ambas citas terán lugar no salón de actos do Centro Cívico de Monforte.

Os técnicos do Conecta Lugo atenden a todas as persoas previa cita, que pode solicitarse a través do número de teléfono 621 346 812 ou no enderezo electrónico conectalugo@cel.es.

Asesoran sobre os programas de apoio e os recursos que pon a Xunta á disposición das pemes para que avancen en innovación e competitividade. Entre estes, préstamos directos do Igape, axudas á incorporación do deseño como ferramenta de innovación e sustentabilidade, subvencións para proxectos de aforro e eficiencia enerxética ou para accións de promoción exterior, todas elas convocatorias abertas actualmente.

DEIXAR UN COMENTARIO

Please enter your comment!
Please enter your name here