Ante a incertidume sobre a probable incompatibilidade do proxecto de tirolina coa condición de BIC da Ribeira Sacra e coa candidatura a Patrimonio da Humanidade, En Marea propón ás Deputacións de Lugo e Ourense unha opción que consideran compatible, sostible, dinamizadora dos valores da zona e xeradora de postos de traballo.

Apuntan, desde En Marea, que a elaboración do Plan suporía a contratación anual de persoas profesionais destinadas ao traballo de documentación e deseño de plans de conservación dos elementos da cultura tradicional.

Cren que o Plan debería conter un apoio aos oficios tradicionais, como a olería; a creación dalgún novo museo ou centro de interpretación; unha liña específica de apoio ás festividades tradicionais singulares, como o Oso de Salcedo (na Pobra do Brollón), ou Entroido Ribeirao (en Chantada).

En Marea aposta porque dito plan sexa coordinado en cooperación entre Concellos, Deputacións e entidades como o Consello Regulador da D.O. ou o Consorcio de Turismo, con apoio da Xunta.