O Centro Cívico de Monforte acollerá o día 20 de marzo, a Xornada informativa de axudas e servizos para PEMES galegas que organizan o Concello de Monforte e a Consellería de Economía, Emprego e Industria. A actividade pretende informar a empresarios e emprendedores sobre as liñas de apoio establecidas por dita Consellería en materia de promoción empresarial.
A xornada comezará ás 19:30 horas e trala presentación por conta do Alcalde de Monforte, José Tomé Roca e do Conselleiro de Economía, Francisco Conde, farase a explicación das liñas de apoio, por Covadonga Toca Carús, Secretaria Xeral de Emprego, Pedro Arenas Barreiro, Director Área Servizos GAIN, e Curro López Martínez, Subdirector de Coordinación do IGAPE. Ao remate celebrarase un viño galego-Networking durante o cal os representantes da Consellería atenderán de xeito individualizado as consultas e dúbidas dos asistentes á xornada.
Para participar é necesario inscribirse antes do día 18, no teléfono 982 884 775 ou no correo emprego_pe@concellodemonforte.com.
Plan de Igualdade
A Concellería de Igualdade de Monforte, a través do Centro de Información á Muller, presenta o día 14, o III Plan de Igualdade de Oportunidades entre Mulleres e Homes 2018-2023 do Concello de Monforte de Lemos.
A presentación pública farase no Salón de Plenos do concello, en dúas sesións, ás 12.30 horas para o persoal político e técnico do concello e ás 13.30 horas dirixida aos axentes sociais e económicos do municipio.
A presentación correrá a cargo de Paloma Seijo Anca, técnica da empresa Senes desenvolvemento Comunitario empresa que prestou a súa asistencia técnica baixo a dirección, coordinación e desenvolvemento do persoal municipal do CIM.
