Sober, un gran escaparate da Ribeira Sacra

O Domingo de Ramos todo o mundo 'comulga' co viño de Amandi e con este territorio. Dende a pregoeira, María do Ceo, ata as autoridades políticas presentes no evento, todos coinciden na exaltación desta terra e do potencial económico que ten a nivel mundial.

Recinto feiral ateigado de xente no momento do pregón. Foto: P.S.

O recinto feiral que acolle os postos das adegas, 24 presentes nesta edición, estaba ateigado de xente contra as 13:00 h. cando facían acto de presenza na carpa que hai diante da Casa do Concello as diferentes autoridades, empezando polo Alcalde Luís Guitián, e continuando coa representación do concello invitado, O saviñao, o deputado de Turismo da Deputación, Eduardo Vidal, e o Conselleiro de Economía, Emprego e Industria, Francisco Conde.

O acto protocolario foi guiado pola xornalista de Onda Cero Monforte, Manola Porto, quen, despois dos diferentes discursos das autoridades nos que se gabou o viño de Amandi e os potenciais vitivinícola e turístico dunha Ribeira Sacra que quere ser Patrimonio da Humanidade, deu paso a María do Ceo, a pregoeira desta edición.

A pregoeira, María do Ceo. Foto: Prensa Sober

O pregón estivo trufado de referencias ao viño ripadas da sabedoría popular galega e portuguesa e tamén de frases de celebridades de todos os tempos e rematou cunha canción composta por ela con letra de Armando González adicada aos viños da ‘Riboira Sacrata’ como ela mesmo dixo. A canción que interpretou, acompañada pola Banda de Música de Sober, foi a seguinte:

RIBEIRA SACRA

Pendurada ó Sil, calma e valente, engaiolas o sol coas cepeiras, sorbes da terra dozuras meigas: matriz miuda, meloso abrente.

Caste que agromas do mesmo cerne terra fecunda: Lugo e Ourense,

¡leda os lindeiros cachos que ó leste tintan e arrolan uvas no berce!

Ribeira Sacra padal de mestres, catedral de goios e videiras, acios gabados da cor campeira, gallardos caldos de bagos febles.

Ribeira Sacra viño fulxente, revistes de veludo e xaneira o grolo lento de lumieira.

¡Engrea a quen te cata mainamente!

Dende a rodriga polas pendentes, deica a desfolla nas túas ladeiras, enches bacelos, colmas ringleiras, dos vindeiros caldos excelentes.

Ribeira Sacra flor que recendes, cor de picota, tella e cereixa, gusto de amora, arando e grosella, prez de madeira, beizón silente.

Ribeira Sacra viño fulxente, revistes de veludo e xaneira o grolo lento de lumieira.

¡Engrea a quen te cata mainamente!

María do Ceo coa Banda de Música de Sober. Foto: P.S.

Unha das pegas que ten este momento é que o gran barullo ambiental fai difícil, por non dicir imposible, que a xente presente no recinto feiral poida escoitar os discursos e o pregón.

As adegas premiadas foron Don Bernardino, Viña Peón, Finca Cuarta e Val da Lenda. Val da Lenda, gañadora barrica. En tintos: Don Bernardino, Viña Peón e Finca Cuarta e en branco Don Bernardino.
Raquel Arias, Luis Guitián e Francisco Conde cos adegueiros premiados. Foto: P.S.
Eduardo Vidal entregando un premio. Foto: Prensa Deputación.
Unha das curiosidades desta edición foi a exhibición en directo da talla en madeira con motoserra a cargo do escultor Eugenio Linares. A obra, que comezou o sábado, estaba xa moi avanzada contra a tarde deste domingo. A talla representa un escano cunha barrica nun extremo e un acio no outro.
Escultura en madeira feita con motoserra / XdL

DEIXAR UN COMENTARIO

Please enter your comment!
Please enter your name here