Tres detidos en Monforte por un intento de asasinato en Coles (Ourense)

No rexisro atoparon unha escopeta, unha armazón dun revólver, 1.200 cartuchos de arma curta e longa, seis teléfonos móbiles e documentación

Servizo aéreo da Garda Civil / wikipedia

Tres veciños de Monforte (Lugo) foron detidos como presuntos autores dun delito de asasinato en grao de tentativa doutro home en Coles (Ourense), así por tenencia ilícita de armas e tráfico de drogas no marco da Operación Pensa.

O 11 de xaneiro deste ano, a Garda Civil tivo coñecemento, a través do 112, de que, tras unha discusión no Concello de Coles (Ourense) había unha persoa con feridas de bala.

Así, a Garda Civil comprobou que unha persoa recibiu na madrugada do 11 de xaneiro un disparo de bala nunha discusión nunha estrada con outras tres persoas. Alí, un deles sacou a pistola e efectuou o disparo que lle alcanzou nunha perna, tras o que se deu á fuga.

O ferido non quixo que a Garda Civil fose informada, pero desde o Centro Hospitalario de Ourense alertaron da entrada en urxencias dunha persoa ferida de bala. A partir de aí iníciase a investigación no marco da Operación Pensa na que colaborou a Unidade Orgánica de Policía Xudicial da Comandancia da Garda Civil de Ourense, o Grupo Rural de seguridade de Pontevedra e o Servizo Cinolóxico.

Neste operativo realizáronse catro rexistros domiciliarios. Así, atopouse na vivenda dun dos detidos en Monforte de Lemos unha escopeta, unha armazón dun revólver, 1.200 cartuchos de arma curta e longa, seis teléfonos móbiles e documentación. Todo iso foi incautado.

Noutro dos rexistros, tamén en Monforte de Lemos, a Garda Civil incautou 159 plantas de marihuana, unha caixa con sumidades floridas secas cun peso de 30 quilogramos e diversos útiles para o seu cultivo.

Ademais, no terceiro domicilio localizouse un zulo supostamente preparado para a ocultación das drogas e o material de procedencia ilícita. Os detidos pasaron a disposición do Xulgado de Instrución Número 2 de Ourense, que decretou o ingreso en prisión de dous deles.

DEIXAR UN COMENTARIO

Please enter your comment!
Please enter your name here