A delegación da zona sur da Asociación Provincial de Empresarios de Hostalería e Turismo de Lugo (APEHL) anunciaba estes días o veredicto despois do correspondente reconto de votos.
Os seguidores da X edición do concurso de Tapas de Monforte de Lemos outorgáronlle a vitoria á tapa “Medallón crocante con compota de mazá e redución de mencía” presentada polo establecemento O Viñedo, un local que non ten nin un ano de vida e que está no espazo da Praza de Abastos da cidade do Cabe.
A segunda tapa máis votada foi a que presentou a Abadía de San Simón, local que está no campo de golf, denominada “O alambique San Simón”, mentres que o terceiro posto foi para O Rabeno con “Dúo galego tropical”.
No acto no que se facían públicos os gañadores do voto popular déronse a coñecer os finalistas das categorías técnicas elixidos polo xurado profesional, que foron:
Na categoría de Tapa Tradicional: O Viñedo, Tapería Centro do Viño, Grelo e Abadía San Simón.
Como Tapa Creativa: Tapería Brancellao, Cervecería Mulligans, Chokolat e Casablanca.
Na categoría de Maridaxe con Viño R.S.: Tapería Centro do Viño, Tapería Brancellao, O Viñedo e Casablanca
Como Tapa Infantíl: El jardín de las delicias e MON, come y sueña
Segundo nos indican dende a organización, os hostaleiros din que venderon máis tapas que o ano anterior malia que o mal tempo non axudou neste sentido.
