O Grupo Municipal Popular de Monforte lamenta que o goberno local se negue a aplicar bonificacións que poderían contribuír a estimular á rehabilitación de vivendas, á eliminación de barreiras arquitectónicas, á repoboación forestal ou a instalar enerxías renovables.

Os populares propoñen bonificacións do 90% no IBI sobre inmobles vinculados a explotacións agrarias ou do 50% para aqueles nos que se teñan instalado sistema de aproveitamento térmico ou eléctrico de enerxía solar.  Tamén do 50%, no caso do I.I.V.T.N.U., para as transmisións de terreos sobre os que se desenvolvan actividades económicas declaradas de especial interese ou utilidade municipal e do 90% sobre a cota do ICIO polas obras de rehabilitación realizadas dentro da actual delimitación de Conxunto Histórico Artístico de Monforte de Lemos e tamén das demais obras que sexan declaradas de especial interese ou utilidade municipal.

Estas son algunhas das propostas que recolle a emenda dos populares en relación á proposta do Goberno local para a modificación das diferentes ordenanzas fiscais para o 2019.