Unións Agrarias acusa a Xunta de “desentenderse do problema” das velutinas

Empraza a Xunta a que "canto antes se faga cargo e poña en marcha un plan para erradicar" a presenza da velutina en Galicia.

As velutinas alimentandose da sabia da corteza duns eucaliptos © Miguel Nuñez

O secretario xeral de Unións Agrarias, Roberto García, acusou a Xunta de Galicia dun “total abandono de funcións” para combater á velutina, tras a morte dun veciño de Pantón por picaduras destas avespas ao atoparse cun niño cando rozaba unha leira.

Roberto García censura que o Goberno galego “se desentendeu do problema, pasándollo aos concellos, que non teñen nin medios nin coñecementos para xestionar” esta situación, igual que ocorre coa “fauna salvaxe”, segundo lamenta.

Así, alerta do “risco” para a saúde. “O que empezou sendo un problema menor está a xeneralizarse e neste momento pasa a ser un risco pola falta dun plan para atacar este problema”, advertiu.

Ademais, incide no cambio de “patrón” das velutinas e alerta que “xa non é un problema dos niños que están nas árbores, senón que se atopan dentro da maleza, con risco real para a poboación”.

O dirixente sindical ten claro que “nun primeiro momento se frivolizou con isto e non se lle deu a importancia que se lle tiña que dar pensando que era un problema puntual”.

“Non se crearon os medios económicos nin técnicos, non se investigou nada para facerlle fronte, mentres noutras comunidades autónomas conseguiron a súa extinción; con todo, aquí vemos que vai a máis”, reprocha a Medio Rural. Por todo iso, empraza a Xunta a que “canto antes se faga cargo e poña en marcha un plan para erradicar” a presenza da velutina en Galicia.

DEIXAR UN COMENTARIO

Please enter your comment!
Please enter your name here