O pasado sábado día 6 tivo lugar a I Xornada de Turismo Científico nas Montañas dos Ancares e do Courel na Estación Científica de Seoane do Courel. Neste encontro promovido pola Deputación Provincial, uns 30 profesionais de diferentes áreas da ciencia expuxeron a súa visión para impulsar estas montañas como un destino científico.

Como poñentes participaron Maite Vence Fernández, de ObserverScienceTourism.com, que afondou en como a conciencia cidada pode construir un xeito diferente de practicar turismo; o enxeñeiro de montes Gaspar Bernárdez Villegas, que expuxo os recursos botánicos deste espazo; o veterinario e investigardor Julián Alonso, que explicou a importancia da micoloxía como recurso turístico; Óscar Rivas López, que abordou a recuperación do oso pardo; e por último Antonio Regueiro, que destacou o papel que xoga a Estación Científica de Seoane no modelo de turismo científico Ancares-Courel.

Doutra banda, tamén tivo lugar un obradoiro sobre creatividade e modelos de negocio. O obxectivo desta actividade é dinamizar esta contorna con proxectos empresariais vinculados a este tipo de turismo, e estivo dirixido a empresas turísticas interesadas en desenvolver a súa actividade nas montañas dos Ancares e o Courel.