A subdelegada do Goberno, Isabel Rodríguez, vén de anunciar o próximo comezo das obras que realizará a Confederación Hidrográfica do Miño-Sil, para dotar de saneamento ao núcleo de Sobredo, no concello de Folgoso do Courel. Os traballos foron adxudicados á empresa VIPECA Obras y Servicios nun importe de 89.531 euros.

Así levarase o saneamento a este núcleo de Folgoso do Courel, que carece de calquera sistema de saneamento e depuración a pesar de estar incluído na Rede Natura 2000. O proxecto inclúe a construción dunha rede de saneamento deste núcleo de poboación, por gravidade e cunha lonxitude aproximada de colectores de 500 metros. No extremo da rede de saneamento disporase unha instalación de depuración con capacidade suficiente para tratar os verquidos.

Para desenvolver esta actuación, o presidente da Confederación Hidrográfica Miño-Sil, José Antonio Quiroga, asinou un convenio coa alcaldesa de Folgoso do Courel, Dolores Castro, no que se estipula que a Confederación financia, executa e entrega as obras de saneamento do núcleo de Sobredo e, unha vez rematadas as obras, o Concello farase cargo da xestión, mantenemento e conservación das obras.