Con respecto ao incendio na casa da música lembran desde Por Chantada as iniciativas que teñen presentado ao respecto das “necesarias melloras” neste edificio e sinalan que catástrofes, como é un incendio, non sempre son evitabeis e poden producirse en calquera momento, pero “a ausencia do correcto tratamento e conservación non axuda. O determinante agora é sabermos que vível de calor se chegou a acadar e se atinxiu á estrutura.” En consecuencia, solicitan:

• Análise do dano e, en función de como a temperatura puido atinxir á estrutura, adoptar as pertinentes solucións.
• Prohibir fumar e cortar eficazmente o tránsito de persoas no inverno polo risco de caídas que produce a xeada.
• Proceder a atender as demandas de Por Chantada formuladas no 2016 sobre o correcto tratamento e conservación do edificio, a comezar polo rexistro de todo o feito e que se faga a partir de agora no Manual de actuacións.
• Aproveitar a reforma necesaria para procurar solucións para a cristaleira do cenario do auditorio, dado que se alcanzan temperaturas elevadas coas consecuencias xa coñecidas: esnaquizado o pano de fundo, gasto elevado en ar acondicionado… O financiamento pode facerse mediante modificación orzamentar, por exemplo desde as partidas 334.489.01 (parte dos 58.000€ de subvención das festas do Carme) e do programa 338 (Festas populares), xa que este ano non se vai gastar o mesmo nas festas patronais.
• Mellorar o mantemento de escadas interiores así como a limpeza do edificio.

Na outra moción Por Chantada lembra que levan anos sinalando o calamitoso estado de varias infraestruturas do termo municipal, e como teñen proposto facer unha relación de pistas polo seu estado de conservación para priorizar o arranxo. Nesta moción piden:

• Dirixirse á Deputación provincial de Lugo para que se arranxe máis dunha ducia de estradas da súa titularidade.
• Impulsar un Pacto polas infraestruturas locais, cunha comisión de seguimento específica, que se reunirá cuatrimestralmente, e que tería as seguintes funcións: Estudar a relación de pistas ordenadas polo seu estado de conservación: clasificándoas en A (estado óptimo), B (bo estado), C (deficiencias leves), D (deficiencias graves), E (deficiencias moi graves e/ou perigo para a circulación). Dito informe elaboraríao o técnico municipal correspondente. Aprobar un protocolo de actuación municipal nas estradas con coberta vexetal (ECV) e no manexo, limpeza e rozado das gabias. Seguimento das actuacións municipais no eido das infraestruturas e elaboración dunha memoria anual con propostas concretas de actuación e análise das deficiencias detectadas.
• Contemplar no vindeiro orzamento aplicacións orzamentares suficientes para o arranxo de case unha trintena de estradas de titularidade municipal que precisanintervención urxente.
• O Pleno municipal de Chantada diríxese ao Ministerio de Fomento para que deixe de usar glifosato e opte polo rozado mecánico das beiravías da N-540, así como no conxunto da súa rede de estradas.

Por Chantada celebra este sábado, 18 de xullo, Asemblea ordinaria anual ás 20 horas no Casino de Chantada.