As visitas ofrécense dende o 18 de xullo ao 16 de agosto, tódolos días excepto luns. “Queremos continuar na liña de anos anteriores cunha oferta turística de calidade e as garantías de seguridade que marcan os tempos,” declara o alcalde, Xosé Lois Maceda.

Polas mañás, entre semana, pódese visitar as dúas escavacións arqueolóxicas que estarán en marcha este verán na Pobra do Brollón: Os Conventos, en Vilachá de Salvadur, e o Castro de San Lourenzo en Cereixa.

A escavación dos Conventos poderase visitar en xullo para seguir os avances dos arqueólogos no xacemento medieval, nun enclave espectacular en plena Ribeira Sacra. Pódese combinar esta visita coa experiencia Adegas da Memoria, un percorrido polo conxunto de adegas tradicionais de Vilachá de Salvadur que inclúe explicacións históricas e unha cata de viños locais (a cata ten un coste de 3€).

En agosto, comezarán as visitas á escavación no Castro de San Lourenzo, un castro mineiro romano reocupado no medievo. Este verán os arqueólogos seguirán a desenterrar a necrópole medieval situada no castro.

Nas fins de semana ofrecerase a visita á Cova das Choias, na parroquia de Óutara, que alberga musgo luminescente, colonias de morcegos, e tamén seres míticos.

As visitas ás escavacións dos Conventos e o Castro de San Lourenzo son sempre ás 10:00. O resto de visitas son baixo demanda. Todas son con previa reserva. Ofreceranse para grupos de mínimo 5 e máximo 15 persoas, excepto a da Cova das Choias que é para un máximo de 10 persoas. O uso de máscara durante a visita é obrigatorio. Para máis información ou para reservar hai que contactar no 650 624 828 (chamada ou WhatsApp).