Nos vindeiros días a empresa procederá á instalación de 12 colectores téxtiles en diferentes zonas estratéxicas da cidade “para dar así resposta á alta demanda que os monfortinos viñan facendo deste servizo”, sinala a Concelleira de Facenda e 1ª Tenente de Alcalde, Gloria Prada.
A colocación dos colectores téxtiles levarase a cabo baixo a supervisión e indicacións da Concellería de Medio Ambiente e será nas seguintes ubicacións estratéxicas da cidade:
- Campo San Antonio.
- Rúa Chantada.
- Avenida de Galicia.
- Rúa Estrella.
- Paseo do Malecón.
- Praza da Estación.
- Paseo de Lugo.
- Estacionamento do Parque dos Condes.
- Rúa Ourense.
- Rúa Morín.
- Rúa Corredoira.
- A Florida.
O Equipo de Goberno, vista a necesidade de contar con máis puntos de recollida, decidiu ampliar o número de colectores de 10, que eran os que había antes do establecemento deste novo contrato de xestión, a 12 unidades. Os dous novos colectores que se incrementan son o da rúa Corredoira e un novo na Florida, que dende agora contará con dous.
Está previsto que a colocación dos colectores se inicie o vindeiro martes 27 de outubro.
Características dos colectores
Os colectores que instalará a empresa para a recollida de téxtiles usados son metálicos e están deseñados especificamente para a recollida téxtil, cun volume útil aproxomado de 2,7 m3. Son ademais colectores adaptados coa boca de entrada na parte posterior para facilitar o depósito da roupa ó cidadán, que poderá acceder ó colector dende a mesma beirarrúa para non ter que bordear o colector pola calzada.
En concreto, son colectores en ferro galvanizado inoxidable dunha sola lama e estrutura ignífuga, con medidas anti-vandálicas. A pintura exterior e os adhesivos de personalización, que incluirán o escudo do Concello de Monforte, están protexidos con barniz antigrafitti.
