Estas obras realizaranse no treito comprendido entre os quilómetros 4 e 6,8, que discorren polas parroquias monfortinas de Baaomorto e Fiolleda, e dan continuidade aos traballos de mellora que a Deputación acometeu o pasado ano cun investimento de 106.000€ no tramo que vai do punto quilométrico 2,6 ata o 4, que pasa por Chao do Fabeiro e que que afecta tamén ás parroquias anteriores.
O novo proxecto vén de ser adxudicado pola Xunta de Gobero e consistirá na reapertura de cunetas, na pavimentación con aglomerado en quente e na correspondente sinalización horizontal. O prazo de execución é de 9 meses.
As melloras nesta estrada teñen un importante valor social, destacou o Presidente da Deputación, pois trátase dunha vía moi utilizada polos veciños e veciñas de Monforte e do Saviñao.
“Defendemos a mobilidade como un dereito básico dos veciños e veciñas da provincia. Cremos que unha boa rede de estradas é fundamental para o equilibrio territorial e para o desenvolvemento do rural, porque axuda a fixar poboación e a achegar os servizos. Ademais, en tempos de crise, a obra pública pode e debe actuar como un motor que incentive a actividade económica e que axude a manter ou crear emprego”, subliña o Presidente.
