O PP afirma que esta vía que rexistra un tráfico considerable e que ten serias deficiencias de sinalización, “carencia que aumenta o risco para a circulación rodada e peonil.” O grupo municipal popular defenderá no próximo pleno da corporación de Monforte unha moción para que o Concello, presidido polo socialista José Tomé, inste á Deputación, tamén presidida por Tomé, a acometer canto antes as melloras necesarias.

A portavoz popular en Monforte, Katy Varela, sinala que a estrada carece de sinalización horizontal no tramo no que o ano pasado se levaron a cabo melloras no pavimento.

Outra das deficiencias que sinalan os populares é a falta de iluminación suficiente nesta estrada no tramo urbano, o que fai incrementar o risco tanto para automobilistas como para peóns.

En canto a sinalización vertical, os populares destacan que moitos dos sinais están seriamente deteriorados (moitos deles están decolorados), outros están rotos e algúns están practicamente caídos.

Varela destaca que as melloras efectuadas no pavimento o ano pasado só afectaron ao tramo ata a parroquia de Baamorto; “o resto atópase en moi mal estado.” Tamén sinala, “a partir do quilómetro 6, en Figueira, a estrada estréitase, polo que é moi perigosa. Non hai quitamedos, pese a que hai considerables desniveis.”