O Concello de Sarria vén de facer público nun comunicado que a situación na Residencia de Anciáns A Nosa Señora do Carme é complicada. Nesta semana finaron dúas persoas e neste sábado 30 de xaneiro contan con 82 residentes e 6 traballadores positivos nas probas PCR. “Os falecidos tiñan patoloxías graves previas e a maioría dos positivos son asintomáticos ou con síntomas leves, todos eles á espera de ser vacinados coa segunda dose”, comentan dende o equipo de goberno.
Dende o concello informan tamén que o concelleiro responsable e Presidente do Padroado da residencia, Benjamín Escontrela, está a pasar a enfermidade. Afortunadamente con sintomatoloxía leve, feito que lle permite levar a dirección coa coordinación dos traballadores. Para atallar esta situación de crise están contando a maiores coa axuda da Xunta, en particular do Sergas, a Consellería de Política Social e Sanidade, tal como esixe o protocolo; e tamén tiveron que recorrer ao reforzo de persoal externo. Segundo matiza o equipo de goberno, “cóntase coa colaboración e axuda, que non intervención”, da Xunta.
No comunicado público recibido insístese en que “as familias están informadas en todo momento e o Concello de Sarria garante que a situación estivo e está baixo control e puxéronse, póñense e seguiranse a poñer todos cantos medios persoais e materiais que sexan precisos”; e mándase tamén unha mensaxe de esperanza e confianza nos profesionais recomendando para rematar que “se faga caso omiso a pseudo informacións malintencionadas, manipuladoras, falsas e inxuriosas”.
Segundo datos do Sergas deste sábado 30 de xaneiro, o Concello de Sarria contabiliza un total de 195 casos positivos .
A OPOSICIÓN
A oposición de Sarria insiste en solicitar unha convocatoria urxente da Xunta Rectora da Residencia A Nosa Señora do Carme e no último Pleno xa preguntaron pola situación do persoal e os recursos materiais da residencia ante a situación actual.
Alegan falta de información por parte do Concello e lembran que hai dous anos que o goberno municipal non convoca a devandita Xunta Rectora cando o habitual é que se realice unha convocatoria ordinaria cada dous meses.
