Os socialistas explican que “o trazado orixinal do Camiño de Santiago ao seu paso pola vila luguesa de Sarria leva seis anos interrompido pola paralización en 2014 das obras da Ponte Ribeira, provocando evidentes prexuízos xa non só para os camiñantes senón para os propios habitantes da vila”.
Así as cousas e mentres non remata o proxecto de terminación da rehabilitación da Ponte Ribeira, “o Concello de Sarria presentaba en decembro de 2019 o ‘Proxecto construtivo de pasarela metálica provisional para Ponte Ribeira no río Sarria’. Para levalo a cabo, e conforme á legalidade esixida, solicitaba en xaneiro de 2020 o informe/autorización pertinente á Dirección Xeral de Patrimonio Cultural, en febreiro á Confederación Hidrográfica do Miño-Sil, O.A. e en novembro á Deputación de Lugo.
Na iniciativa socialista sinálase que “ante o silencio da citada Dirección Xeral diante das solicitudes de diversas administracións, a Xunta de Goberno do Concello de Sarria acorda en decembro de 2020 continuar co proxecto da pasarela provisional. Unha decisión que comunica ao Goberno autonómico sen ter recibido pronunciamento ao respecto. Curiosamente é a partir desa comunicación á Xunta de Galicia cando a Dirección Xeral, en cuestión de poucos días, lle remite ao Concello de Sarria un informe desfavorable sobre a base do ditame que o Consello Asesor dos Camiños de Santiago adopta nunha xuntanza celebrada dende hai máis dun ano”, advirten.
Os socialistas queren coñecer, “por que non se lle remitiu o informe solicitado sobre ese proxecto á Confederación Hidrográfica do Miño-Sil, O.A.?. E por que non se lle comunicou ao Concello de Sarria o ditame respecto da citada obra do Consello Asesor dos Camiños de Santiago acordado na sesión do 26 de febreiro de 2020?”.
