Dúas mulleres, nai e filla de 89 e 48 anos de idade, foron atopadas en estado de desnutrición nunha vivenda de Chantada na que levaban varios días encerradas, polo que tiveron que ser trasladadas ata un centro hospitalario. Segundo informan fontes da Policía Local, foron os veciños os que deron a voz de alarma ao Concello, xa que levaban varios días sen ver a estas dúas persoas.

Deste xeito, os axentes aproximáronse ata a casa durante varios días para tratar de localizalas, dado que tampouco se tiña constancia de familiares cos que as mulleres mantivesen o contacto. A pesar de que chamaron repetidas veces á porta, non viron indicios de actividade na vivenda. De acordo co relato da Policía Local, finalmente solicitouse unha orde xudicial para poder articular un dispositivo co que acceder ao domicilio.

Coa axuda dos bombeiros, que romperon un cristal do primeiro piso, os policías lograron entrar na casa e acharon ás dúas mulleres nunha cama desnutridas e deshidratadas, mentres que o domicilio se atopaba en moi malas condicións. Ademais, no momento en que as localizaron, ningunha das dúas lograba articular un discurso coherente.

Entón, os axentes avisaron ao 061-Urxencias Sanitarias para que dese atención médica ás dúas mulleres. Finalmente, foron trasladadas ata o hospital comarcal de Monforte, onde aínda se atopan.