Esperta Monforte presenta unha moción ao próximo pleno do concello monfortino solicitando o mantemento e coidado da pasarela do Malecón. Sinalan que a pasarela “atópase nunhas condicións impropias dunha cidade como Monforte e presenta definciencias que non deberían permitirse nun lugar excepcional no centro da cidade, coincidindo co espazo verde máis extenso que ten o río Cabe ao seu paso pola cidade.”

Esperta Monforte sinala que o concello fai investimentos en “lugares menos transitados, menos valorados e con menor repercusión turística e económica”, e consideran prioritario que os investimentos se fagan nun lugar tan visitado polos turistas e tan emblemático para o pobo de Monforte como é o Malecón. Instan ao equpo de goberno a restaurar e coidar a pasarela e solicitan que se utilicen os medios necesarios para facela máis accesible a persoas con mobilidade reducida.

Leva a pleno tamén un rogo e unha pregunta, se o equipo de goberno está utilizando persoal do concello para o control das pancartas de “Salvemos o Malecón” ou trátase dun bulo e pide que se expliquen os motivos polos que a plica da concesión do servizo de explotación do Centro do Viño non inclúe a subrogación do persoal laboral existente.