Unha muller tivo que ser excarcerada do interior do seu coche tras sufrir unha colisión contra outro vehículo mentres circulaba de madrugada por Monforte de Lemos.
Segundo informa o 112 Galicia, o choque tivo lugar na estrada N-120, ao redor do quilómetro 521. Sobre as 2,00 da mañá deste domingo, a central de emerxencias recibiu unha chamada na que a Policía Nacional solicitaba axuda para esta persoa que estaba ferida e atrapada no seu turismo.
Así, o 112 pasou o aviso aos bombeiros do municipio, a Urxencias Sanitarias-061, á Garda Civil de Tráfico, á Policía Local e aos membros de Protección Civil. Ademais, para asegurar a vía, notificou o sucedido ao Centro de Xestión de Tráfico e ao persoal de mantemento de estradas.
Ao final da intervención, os bombeiros confirmaron aos operadores do 112 a excarceración dunha muller, que foi a única ferida no sinistro, para que puidese ser trasladada polo persoal sanitario.
