Coa xubilación de persoal médico amortizáronse nos últimos tempos un mínimo de catro prazas (Monforte, Carballedo, Sober e Pantón) o que redunda nunha maior desatención e mingua de servizos no rural. “No interior galego non só hai que fixarse no cupo de cada médico, tamén hai que atender á dispersión e o que se tarda na atención ao fogar”, sinalan desde IGV e lembran que os maiores problemas se dan agora en Pantón e Chantada, onde perigan varias prazas de médico de familia.

Desde Interior Galego Vivo amosan o seu apoio á veciñanza e colectivos que se mobilizan contra a perda de servizos sanitarios e queren recoñecer ao persoal sanitario que asume nas súas costas o sobreesforzo que supón a falta de cobertura das prazas. Segundo IGV este problema é estrutural “pola falta de estabilidade laboral que ofrece o SERGAS, con contratos que se fan por días, despedindo nas fins de semana.”

En canto á carencia de atención pediátrica no distrinto sanitario tamén a consideran estrutural. “Estes días Chantada estivo outra vez sen pediatra e Monforte, onde acoden os concellos da contorna, ten unha listaxe de agarda para atención de consultas por enfermidade que pode chegar ás dúas semanas. En Quiroga só hai pediatría dous días á semana e este é o centro de referencia para todo o Courel.”

Desde Interior Galego Vivo consideran que o SERGAS debe impulsar un plano específico para a mellora da Atención Primaria e Pediatría no distrito sanitario de Monforte, O Barco e Verín, tendo en conta as condicións laborais e a necesidade de maiores incentivos para exercer no interior galego.