Como vén sendo habitual estes anos, Xornal de Lemos aproveita a data do 28 de decembro para elaborar unha noticia ficticia, unha iniciativa que ata agora están acollendo moi ben as nosas lectoras e os nosos lectores.
No día de onte sacamos baixo o titular “Nace na Comarca de Lemos a plataforma reivindicativa “Bóveda existe!” unha peza na que queriamos reivindicar o papel de Bóveda na Comarca. Consideramos, con toda a boa intención, que por ser un concello pequeno e do que non se fala tanto como doutros da contorna, podía resultar interesante visibilizalo.
Dende Xornal de Lemos sabemos que o Concello de Bóveda é un concello tranquilo, con dinamismo e moi ben situado estratexicamente. Ten moito do que presumir e moito que ensinar. En calquera caso, a nosa ‘inocente’ intención –con maior ou menor fortuna– foi lembrar con retranca que Bóveda existe e existirá, e que se fala pouco do seu papel na Ribeira Sacra.
