Varias asociacións veciñais, culturais e de montes coincidiron nos últimos meses en actos arredor da Ribeira Sacra. Destes encontros xurdiu a mesma inquedanza: como contribuír á candidatura da Ribeira Sacra ante a UNESCO “dende o noso saber e coa nosa opinión.”

Desde a organización aseguran que o encontro quere ser un espazo para poñer en común as achegas veciñais sobre a Ribeira Sacra. “Trátase de compartir as inquedanzas, ver en que coincidimos e tomar a palabra. Queremos que a nosa voz sexa tida en conta pola Administración competente na materia,” afirman. Aseguran que o seu propósito é colaborar, promover iniciativas e fomentar o recoñecemento dun territorio habitado por xente que coida da terra, da paisaxe e do patrimonio (in)material.

Para un bo funcionamento do encontro propoñen que aquelas asociacións que queiran, expoñan durante 5-10 minutos as súas ideas, preguntas ou suxestións. Poden ser dende iniciativas sobre o patrimonio da Ribeira Sacra até solicitar charlas informativas sobre o impacto da declaración de Reserva da Biosfera, Rede Natura e da UNESCO nos montes e nas ribeiras. Contra ás 13:30 h. proporase un documento que recolla o falado e sexa identificativo de todas as asociacións.