Desde o concello de Quiroga aseguran que o Ministerio de Transportes quere actualizar as concesións deixando soamente as paradas en grandes núcleos de poboación.
“Tras coñecer o anteproxecto da redución das paradas da liña que une Galicia con Madrid, nas que se incluiría a parada de Quiroga, o alcalde de Quiroga, Julio Álvarez, vai presentar un recurso en contra esta supresión,” aseguran desde o concello. Esta liña de autobús de longa distancia leva uns 30 anos facendo este recorrido e parando en Quiroga.
E o BNG de Quiroga recolle as queixas da veciñanza sobre a supresión de paradas na liña O Barco-Ourense. “Tras consultar servizos e horarios do traxecto coa empresa adxudicataria entendemos que hai paradas que se suprimiron que potencialmente dan cobertura a moitos núcleos rurais aos que deberían garantir un servizo. Falamos dos casos das paradas de Montefurado, Bendilló, Paradaseca-Sequeiros, Os Novais ou
Freixeiro,” sinalan desde o BNG.
A este respecto os nacionalistas presentaron un escrito no ‘Servizo de Mobilidade de Ourense’ (Xunta de Galicia) para habilitar paradas que foron suprimidas no tramo do servizo que descorre pola N-120 no Concello de Quiroga.
