Desde o PSOE advirten de que o Goberno local do Partido Popular “non fai ningún dos arranxos precisos (persianas estragadas, vidros rotos, luces fundidas, entre outros) para o bo funcionamento do centro educativo, onde os nenos e nenas reciben educación, poñendo en risco incluso a súa integridade física”.
Os socialistas din que o Alcalde e o seu equipo de goberno “están ignorando tódolos requirimentos enviados pola directora deste centro, para que o Concello cumpra coas súas obrigas de mantemento destas instalacións”.
Dende o PSdeG lembran ademais que a directora do CEIP formou parte da Corporación municipal de Quiroga, exercendo como tenente de Alcalde ata finais de 2020, data na que presentou a súa dimisión. “Por iso, esperamos que esta actitude por parte do Alcalde do PP non sexa unha vendetta de ataques persoais cara unha traballadora pública”, asegura o voceiro socialista.
“Solicitamos á Consellería de Educación, ao Delegado da Xunta e á Xefatura Territorial de Educación que poñan cordura neste tema tan sensible e conviden ao Alcalde a exercer as súas funcións, deixando a un lado os seus totalitarismos para que impere o sentido común, polo ben de todos”, afirma Vicente Parra.
“son vostedes moi cansinos”
O voceiro do PSdeG lembra que, ante o rogo que presentou no último Pleno no que instaba ao Goberno local a cumprir coa Lei nas súas obrigas sobre o mantemento do CEIP, o Alcalde respondeu: “son vostedes moi cansinos”. Esta é a seriedade do Alcalde de Quiroga, rirse das queixas e das peticións das nais e pais do noso municipio”.
O socialista lembra que o rexedor tamén exerce como representante dos Consellos Escolares de tódolos concellos de menos de 5.000 habitantes de Galicia, polo que está dando “un exemplo nefasto e unha mostra de hipocrisía porque nin sequera cumpre coas súas propias obrigas no concello”, insisten.
Vicente Parra critica tamén as respostas que o Alcalde deu á cidadanía sobre esta anómala situación. Diante das reiteradas queixas da dirección, do consello escolar e da ANPA do colexio, a resposta rexedor foi cambiando ao longo do tempo, “xa que incluso tentou cambiar a titularidade do centro, algo que lle foi denegado pola Conselleira. Despois alegou que non tiña orzamento, e por último, a máis insultante, que non tiña acceso ás chaves do centro. Todo un cúmulo de despropósitos e desatinos. E sen esquecer que os máis prexudicados son os nenos e nenas do CEIP de Quiroga”, replican.
“Esperamos que o novo curso escolar poida desenvolverse con total normalidade, xa que as alumnas e alumnos do noso colexio non teñen por que padecer a incompetencia do Alcalde e do seu Goberno. Queremos un centro educativo digno e operativo, no que poidan impartirse os novos cursos con tódalas garantías educativas e medidas de seguridade. O Alcalde debe cambiar a súa actitude e poñerse a traballar polo futuro do noso Concello”, din.
