O BNG cre que a supresión de servizos sanitarios tanto no Hospital Comarcal coma na primaria segue o patrón do recorte e a privatización. “O Sergas ten marcada unha folla de ruta na que se propón sumprimir médicos de familia nos centros de saúde como aconteceu en Pantón, e está a punto de executar no Saviñao. Agora din que non hai médicos, pero esquecen os vinte anos de política de precarización do persoal facendo contratos por días e/ou semanas e fomentando a fuxida de titulados” manteñen dende o BNG comarcal.
Desde o BNG aseguran que van desparecendo servizos, unha vella fórmula para lexitimar no tempo a política de desmantelamento sanitario, con consecuencias especialmente graves nas comarcas do sur pola situación periférica da capital de provincia e cabeza de área sanitaria, “que antes tiñamos en Monforte” lembra a responsable comarcal, RosaAna Prieto.
O BNG afirma ser contundentes diante da falta de atención crecente nos servizos sanitarios da comarca, “á ilóxica medida de vacinación no IES Río Cabe para todas as comarcas, súmase agora a falta de persoal en toda a primaria, algo planificado desde o propio Sergas que non saca a concurso prazas nos centros de saúde, como o de Pantón, e escúdanse na falta de profesionais, pero nin lle dan a estes a oportunidade de concursaren” lembra Prieto Florines que aprecia “unha diferenza substancial entre o que din e o que fan desde a consellería de Sanidade, o que ten que ter unha resposta social,” por iso máis alá das iniciativas parlamentares e de promover mocións nos concellos, anuncian concentracións, “se o Sergas non depón a política de recorte de servizos e persoal”.
“Os xestores de recursos ven cifras, as políticas dos servizos públicos teñen que ver seres humanos”, insisten dende o BNG, e reclaman que “o Sergas ten que facer políticas públicas nas que o factor socioeconómico é determinante, xa que logo, enviar a xente a Lugo facer probas supón un aforro para a administración, pero un custo para as familias inaceptable cando falamos dun servizo público, máxime falando da saúde das persoas” sentencian.
