Trala sinatura do convenio de colaboración coa achega de 80.000 euros, o presidente da Deputación de Lugo, José Tomé, afirmaba que esta colaboración económica chega “para que poidan ofrecer máis e mellores servizos públicos aos seus veciños e veciñas”.

Esta primeira achega forma parte dun plan plurianual de 358.160 euros que axudarán ao Concello de Quiroga a dotar ao camposanto de 1.138 unidades de enterramento máis –entre panteóns e nichos-, novos accesos, zonas axardinadas, un local de culto, aseos, almacén e peche.

“Unha obra importante, para a que o Alcalde nos pediu colaboración, e á que hoxe lle damos cumprida resposta, para que os veciños e veciñas de Quiroga poidan dispoñer dos servizos que precisan”, subliñou Tomé Roca, que explicou que esta é a forma de traballar da Deputación. “O investimento que formalizamos aquí é un exemplo do modelo de xestión e de facer política que practicamos na institución provincial”, sinalou tamén.