O presidente da xestora do PP local, José Rodríguez, sinala que “o caixeiro foi desconectado este venres; despois dun mes no que, practicamente, non funcionaba”. Esta situación, segundo o popular, “prexudica seriamente aos negocios locais e aos veciños e veciñas -especialmente, ás persoas maiores que teñen máis dificultades para desprazarse a outras localidades- porque, ao non dispoñer deste servizo en San Clodio, vémonos obrigados a desprazarnos a Quiroga, que é onde se atopa a oficina máis próxima”, explica.

Rodríguez insiste en que “o goberno local debe tomar cartas no asunto e facer as xestións necesarias, dentro das súas competencias, para defender os intereses dos veciños e veciñas”. Neste caso, trátase dun “servizo básico para aquelas persoas que non están familiarizadas coas novas tecnoloxías e que, polo tanto, non dispoñen doutra forma para facer os pagos das súas compras que non sexa a retirada de diñeiro en efectivo”.

Os populares lembran que os Concellos poden solicitar a súa adhesión ao acordo entre a Xunta e a Fegamp para proceder á instalación de caixeiros para que os usuarios fagan xestións ordinarias como a retirada e ingreso de cartos en metálico, a actualización das libretas bancarias ou o pagamento de recibos sen ter que desprazarse a outras localidades.