A entidade cultural Segredos de Pantón está a recuperar a tradición entroideira das parroquias do concello dende hai uns anos. Baixo o paraugas de ‘Entroido do Cabe’ colleitaron material para poder recuperalo e festexalo nas parroquias de San Fiz de Cangas (Arribada), San Xoán de Frontón (Frontón, Lornís e Seragude) e San Romao de Acredre (Budián).
Neste último lugar, o vindeiro domingo 19 de febreiro a asociación de veciños San Brais de San Romao de Acedre e a propia asociación cultural Segredos de Pantón farán un percorrido do “Entroido de Budián” pola parroquia. Está previsto que saian ás 10:30 h. dende o Campo en Budián, e dende alí percorrerán todas as aldeas de Acedre e incluso algúns lugares estremeiros pertencentes á freguesía de Santiago de Cangas.
Dende as asociacións organizadoras convidan á xente a participar e lembran que non faltará a presenza dos Farranquís e dos Brancos.
