Xosé Antonio Touriñán é un todoterreo da comedia e da interpretación. Coñecido polo dúo que formaban Nucha e Mucha, pola súa participación en programas da TVG como Tourilandia ou Land Rober, e tamén nos últimos tempos polos seus papeis como actor tanto en cinema como en teatro, considérase hoxe en día como un top do panorama artístico galego.
Dende o Concello de Sober lembran que xa estivo tempo atrás nunha Feira do Viño cun espectáculo a cargo do dúo “Nucha e Mucha, as Cantareiras de Ardebullo”, que fora enormemente aplaudido polo público.
Agora, veciñas e veciños, ademais de toda a xente que asista á XLIII Feira do Viño de Amandi, terán a oportunidade de velo de novo, pero esta vez en solitario e como pregoeiro do evento máis importante do ano para o Concello de Sober. A lectura do pregón será o día 2 de abril, domingo de Ramos, ás 13:00 h.
