O salón de actos encheuse de xente para acompañar e escoitar as propostas de José Portela Gómez-Macías, novo candidato do BNG á alcaldía de Taboada que toma así o relevo do actual concelleiro da formación nacionalista, Xosé Antonio Ledo.

O candidato estivo acompañado polos membros da candidatura, polos deputados no Parlamento de Galicia, Xosé Luís Rivas Cruz ‘Mini’ e Carme Aira Díaz e pola vicepresidenta da Deputación, Maite Ferreiro.

Os nacionalistas apostan por un cambio de goberno en Taboada, “para sair da situación de parálise na que se atopa o concello”. Aseguran que hai que tomar medidas para evitar o despoboamento e a perda de servizos, facendo especial fincapé no sector primario e na sanidade, sector no que traballa o candidato. Dinamizar o polígono industrial e incentivar o turismo, como concello da Ribeira Sacra con todas as potencialidades que lle son propias a este territorio, son algunhas das propostas dunha candidatura que louba o traballo das asociacións culturais e comerciais do municipio.