Desde o Goberno local agardan ter o mesmo trato por parta de Deputación de Lugo e que a residencia poida construírse canto antes. “O último que soubemos foi que a Deputación ía adaptar os prezos á realidade do mercado, pero en catro anos non se ten avanzado absolutamente nada, nin se teñen iniciado as obras en ningunha das dúas residencias.”

Lamentan desde o equipo de goberno que o PSOE local non lle esixa aos socialistas da Deputación que cumpran as súas promesas e critican que a oposición, tanto C@urel Vivo como o PSOE local, “o único que achegue a estas alturas ao ter xa concedida licenza municipal sexa enredar co cambio de emprazamento da residencia, poñendo trabas en lugar de sacar adiante a súa construción.”

No último Pleno municipal o equipo de Goberno reclamaba que a Deputación presentara o proxecto da residencia da terceira idade do Concello de Folgoso do Courel adaptado á nova realidade actual, “pois estamos a falar dun convenio que se comprometeu no 2015, se firmou no 2018, e que xa se prorrogou en 2 ocasións.”

O Goberno local considera que “a veciñanza non merece este desprezo continuo dando largas a un proxecto tan necesario nun municipio cunha poboación de idades moi avanzadas e con gran dispersión xeográfica”

Revisión do proxecto e prórroga do convenio

A principios do mes de decembro a alcaldesa reuníase co deputado delegado Pablo Rivera, quen lle aseguran que tiñan que revisar o proxecto polo aumento dos prezos dos materiais coa intención de evitar problemas de licitacións, “comprometeuse a facilitar esta información en xaneiro deste ano, sen que o teña feito.”

No convenio asinado no seu día estimábase un investimento de 1,4 millóns de euros, dos cales 1,2 serían achegados pola Deputación Provincial e o concello achegaba 200.000 euros e os terreos necesarios para  construción da residencia e centro de día. O 10 de decembro de 2019 elevouse a escritura pública a cesión gratuíta da parcela á Deputación de Lugo e o 13 de xaneiro do 2022 o concello concedía licenza urbanística á Deputación de Lugo para levar a cabo ditas obras.

O equipo de goberno asegura que cumpriu coas súas obrigas, ademais dos trámites para a execución xestionáronse novas addendas ao convenio para prorrogar a construción residencia con fecha límite de entrega das obras a xullo de 2025, “pero seguimos sen saber nada.”