Os polos de emprendemento da provincia atenderon desde a súa posta en funcionamento, hai 3 anos, máis de 1.100 proxectos de persoas emprendedoras. A área de autocaravanas en Sober é unha das empresas coas que colabora o polo de emprendemento de Monforte, fomentando a iniciativa empresarial, dinamizando o mercado de traballo e fixando emprego, atendendo as demandas dos diferentes territorios e sobre todo das zonas rurais.

Os cinco polos de emprendemento e emprego da provincia atenderon máis de 1.100 proxectos, dos que case 800 seguen activos. O número de persoas emprendedoras que acudiron a estes polos de emprendemento achegouse ao milleiro, das que o 56% foron mulleres. Ademais, arredor do 55% destes emprendedores sitúanse entre os 30 e os 55 anos. Ao longo destes anos, estes centros realizaron máis de 3.400 titorías, das que arredor de 1.100 foron en liña e máis de 2.300 de xeito presencial.

O sector que predominou entre as iniciativas emprendedoras impulsadas desde estes polos lucense foi o da hostalería, cun 20%; seguido polo do comercio (16%) e o dos servizos (12%).

“Estes espazos de dinamización e captación de proxectos ofrecen, entre outros, servizos de información sobre oportunidades de emprendemento; asesoramento personalizado para cada territorio; espazos de traballo temporal e networking; captación de investimento e financiamento; e orientación, asesoramento e recursos físicos para os emprendedores”, indicaron os deputados populares. Ademais, os usuarios poderán acceder a convocatorias anuais de axudas para a consolidación de investimento e a xeración de postos de traballo.