A cabeza de lista, Katy Varela, destaca que o PP concorre a estes comicios cun equipo formado por “persoas comprometidas con Monforte de Lemos, cheas de ilusión por mellorar as perspectivas de futuro da cidade, do municipio. Representan a diferentes sectores da sociedade e nela concorren persoas afiliadas ao partido desde hai décadas, outras que se incorporaron nas pasadas eleccións e novas caras que se sumaron a este proxecto cun alto grao de traballo e compromiso.”
Acompaña á candidata, como número dous, José Luis Rodríguez, empresario monfortino do sector agrícola “coñecido pola súa capacidade de traballo e responsabilidade.” A seguinte na lista, María Luisa Vázquez, actualmente xefa da área de sistemas do Hospital Público de Monforte de Lemos, “gran coñecedora do sistema sanitario e con alta implicación en distintas agrupacións da cidade, destacando o seu labor como presidenta do Club fluvial de Monforte de Lemos”. Víctor Manuel Rodríguez López é o único dos catro concelleiros que ten o Partido Popular que repite xunto á cabeza de lista. Katy Varela destaca del “a súa lealdade e compromiso coa cidade, co partido e comigo; Víctor foi fundamental nestes catro anos e agradezo a súa implicación a pesar das súas diversas ocupacións”.
En quinto lugar figura o xefe de área de Medio Rural da comarca, Emilio Iván Vázquez. Entre outros, figuran na candidatura, José Manuel Rodríguez Gómez, xubilado de Otis e que mostrou un gran compromiso co proxecto de Katy Varela estes últimos 4 anos; María Luz Vázquez, cunha ampla traxectoria como empresaria de telecomunicacións, e María Carmen Pérez Álvarez, que ocupou durante o goberno de Nazario Pin a importante concellería para o PP de Servizos Sociais, Muller e Familia. José Vicente, xefe do departamento de farmacia do hospital comarcal, María Jesús Casado Barrio, catedrática de Matemáticas no Instituto Daviña Rey .
A candidata popular á alcaldía sinala: “Quero que os monfortinos saiban que tanto estas persoas que conforman a lista como outras que forman parte do partido e traballan sen estar na lista, tomámonos moi en serio o futuro da cidade e sabemos que aínda quedan moitas cousas por facer e mellorar, motivo polo cal nos presentamos ás eleccións para gañar e formar un equipo de goberno responsable, eficaz e comprometido por Monforte”.
