O domingo 23 de abril, a Igrexa da Ermida foi o lugar escollido para a sinatura dun convenio que compromete ás Igrexas de Castro Caldelas e da Ermida, en Quiroga, a celebrar en agosto unhas misas na honra á Virxe dos Remedios.
O convenio establece, a grandes trazos, que os días 8 e 12 de agosto terán lugar esas misas, actos relixiosos nos que coincidirán xuntas as dúas tallas das patronas así como tamén todos os elementos desta celebración barroca que caracterizan as dúas romarías: o Meco e as Pampórnigas (A Ermida) xunto co Irrio Peliqueiro e os Exvotos (Castro Caldelas).
Dende hai anos estableceuse unha colaboración entre as Igrexas de Quiroga-Courel e de Castro Caldelas que levaron a estudar os xacementos do Burgo de Caldelas, de San Xoán de Camba e da Ermida, así como de axuda mútua en celebracións de Semana Santa, Exposicións e outros actos.
O acto do domingo na Ermida serviu para deixar por escrito este compromiso e no acto participaron conxuntamente o Meco, as Pampórnigas, o Irrio Peliqueiro e os Exvotos. Asinaron os respectivos cregos de cada Igrexa –Jesús Río Ramilo (Quiroga) e José Manuel Armesto (Castro Caldelas)– e estiveron presentes veciñas/os da Ermida ademais da alcaldesa de Castro Caldelas, Sara Inés Vega.
Respecto do intercambio de colaboración, o 8 de agosto será a data na que suba a Castro Caldelas dende a comitiva da Ermida, e o 12 do mesmo mes baixarán dende Caldelas para facer o rito na parroquia quiroguesa.
A Adega Casa de Outeiro, asinante dun convenio de colaboraión recente coa Asociación Souto do Val, tamén estivo presente e ofreceu un aperitivo ás e aos presentes.
