O BNG leva anos reivindicando a modernización deste regadío á Confederación Hidrográfica do Miño-Sil e solucionar a situación dos regantes. O regadío afecta aos concellos da Pobra do Brollón, Bóveda e Monforte de Lemos, entre outros municipios do Val de Lemos que contan cun sistema de regadío antigo e con falta de mantemento.

Denuncian esta situación de abandono e insisten na necesidade de melloras para incrementar a capacidade produtiva dos terreos de cultivo. “Trátase de miles de hectáreas de terras de cultivo que se atopan nun estado de abandono. O sistema de regadíos esta obsoleto e leva a un desequilibrio no subministro de auga facendo que nunhas zonas se produzan inundacións mentres outras non reciben auga. Pérdense miles de litros de auga de forma absurda”.

Para o BNG “a Confederación Hidrográfica debería actuar con celeridade e urxencia ante un problema cun negativo impacto medioambiental ao desaproveitar a auga embalsada para regadío no río Mao, e impedindo a posibilidade de poñer en produción un total de 5000 hectáreas que están sen cultivar”. Refírense tamén á necesidade de actualizar o censo de regantes, conxuntamente coa Xunta, renegociar as condicións e cotas de pagamentos, e condonar a débeda acumulada, “que é produto da falta de dilixencia e eficacia por parte das dúas administración para dar garantías xurídicas a esta comunidade de regantes. Neste sentido, hai un acordo aprobado por unanimidade no Parlamento galego.”

En resposta aos nacionalistas, a Confederación indica que asinou un Convenio coa Universidade de Santiago para a elaboración dun plan integral para aproveitamento agronómico do regadío Val de Lemos., “A Confederación non concreta as medidas a levar a cabo nin prazos temporais. Unicamente sinala que se están a avaliar as obras de mantemento e reparación necesarias”. Tamén a Confederación afirma que as infraestruturas se reparan e limpan conforme ás necesidades existentes, para o BNG, a realidade contradí estas afirmacións.