Esta cita gastronómica recuperouse no 2022 tras suspenderse a súa celebración dous anos por coincidir coa pandemia da Covid-19. Desde o concello explicábase que “a decisión de adicalo á loita contra o cancro de mama, parécenos moi acaída, porque onte xoves vimos de celebrar o Día mundial contra o cancro de mama, e o Cume Tapas Exprés dá así continuidade a esta conmemoración, poñéndose do lado de todas as mulleres que están a sufrir o sufriron esta enfermidade.”
Co lema “Maratón gastronómico por elas” quérese homenaxear a toda aquela xente que traballa na loita contra o cancro de mama, “que desgraciadamente é xa o tumor máis diagnosticado do mundo.”
Convídase ós veciños e turistas a participar neste evento e degustar as orixinais elaboracións que conforman este Cume Tapas Exprés, “que proben unhas tapas diferentes e únicas elaboradas por 6 locais de referencia na hostalería da nosa cidade, e que estou seguro de que non lles van defraudar”.
No acto de presentación do Cume Tapas, estiveron o Concelleiro de Servizos, José Luis Losada, o vicepresidente da Asociación de Hostaleiros de Lugo, José Manuel Cela, a Xefa Territorial de Turismo da Xunta en Lugo, Paloma Vázquez, a Presidenta da Xunta Provincial de Lugo da Asociación Española Contra o Cancro, María Luz Abella, así como diversos membros da Corporación municipal, autoridades e representantes do sector hostaleiro. O acto foi presentado pola xornalista, Manola Porto.
