O IES A Pinguela ofreceu esta pasada semana un interesante evento dirixido ao alumnado e profesorado dos ciclos de Calzado, Confección e Moda e de Imaxe Persoal. Foi a presentación do libro “El Marketing y el protocolo familiar”, obra do empresario xubilado Pedro Salvadores Salvadores.
O libro reflicte experiencias e vivencias dunha vida empresarial que se inicia en Astorga e se alonga máis de 50 anos, nuns tempos nos que o entorno empresarial se tivo que adaptar desde a primeira liberarización económica do franquismo ata os pactos da Moncloa, entrada na Unión Europea, no Euro e nos Acordos do Comercio Mundial de 2005.
O autor maragato destacou a “importancia do social en todos os aspectos da xestión da empresa”, desde a compra das materias primas ata o proceso de venda, pasando pola
fabricación e o marketing. Tamén salientou a necesidade de establecer un protocolo xurídico claro nas empresas de tipo familiar como foi a súa.
A maiores, resaltou a importancia da imaxe corporativa para manter e captar novos clientes, a súa aposta pola calidade e a importancia da certificación ISO 9001-2000 como algo básico para a internacionalización e para as relacións entre empresas e tamén como garantía diante de usuarios e consumidores.
