O Consorcio de Turismo Ribeira Sacra, o Concello de Nogueira de Ramuín e Iberdrola únense para fomentar o turismo en Santo Estevo con este proxecto piloto. O acto inaugural estivo presidido por Miguel Ángel López García, Director da Bacia do Sil en representación de Iberdrola, o Presidente en funcións do Consorcio de Turismo Ribeira Sacra, Luis Fernández Guitián, e o Alcalde do Concello de Nogueira de Ramuín, Julio Carlos Temes Pereira.
“Dáse así un fito histórico no territorio. Nunca antes unhas instalacións deste tipo permitiron a entrada a persoas alleas á empresa, salvo visitas escolares anos atrás”, destacan desde o Consorcio de Turismo. Esta é unha aposta polo turismo industrial na que o Consorcio de Turismo leva tempo traballando e que agora, gracias a colaboración de Iberdrola, é unha realidade.
Luis Fernández Guitián resaltou a este respecto “que a posta en valor e a accesibilidade ao Patrimonio Industrial da Ribeira Sacra, xa era un obxectivo antes da declaración BIC da Paisaxe Cultural. Neste contexto, e como acabamos de comprobar no congreso celebrado esta semana no Mosteiro de Santo Estevo, con especialistas vecellados a UNESCO e a ICOMOS, a apertura das portas deste tipo de infraestruturas cobra máis sentido se cabe. Son parte ineludible da realidade do noso territorio“
A visita ao complexo de Santo Estevo incluirase dentro dun percorrido polo Concello de Nogueira de Ramuín, descubrindo algúns dos seus moitos atractivos turísticos (miradoiros, as mámoas das Cabanas ou o Mteiro de Santo Estevo de Ribas de Sil).
O Consorcio agradece a implicación de Iberdrola para a preparación das visita, “É fundamental que os visitantes comprendan e interioricen que a paisaxe da que hoxe temos, a navegabilidade dos ríos ou o moldeado das ladeiras para a produción vinícola, forman parte dunha paisaxe viva, adaptada e moldeada pola presencia humana para o seu aproveitamento en distintos sectores produtivos e en diferentes épocas”
A Caverna de Sto Estevo rutas / Consorcio de Turismo Ribeira Sacra
Nunha primeira proba piloto, estas visitas estarán dispoñibles, só con reserva previa, os venres e sábados comprendidos entre o 17 de novembro e o 9 de decembro. Terán unha duración total aproximada de 4 horas, incluíndo os recursos mencionados anteriormente.
Os visitantes comezarán a xornada, acompañados dun guía oficial ás 10:00 horas. A da central será a última parada do percorrido para acceder ás privilexiadas vistas dende o alto da presa (115 metros sobre o nivel do río) e á xoia da central, a caverna coñecida como Santo Estevo II. A experiencia estará dirixida a persoas maiores de 12 anos, por cuestións de seguridade, e para un máximo de 15 persoas en cada saída. A actividade terá un custe de 6€ por persoa. A reserva das prazas está aberta na web do Consorcio de Turismo, turismo.ribeirasacra.org
