O delegado territorial de Lugo, Javier Arias, comprobou o pasado mércores 15 de novembro o resultado da actuación de mellora e ampliación do Parque Infantil da Alameda, a carón do río Asma e o Paseo Fluvial. As obras foron financiadas con cargo á orde de axudas da Vicepresidencia primeira para a creación e acondicionamento de infraestruturas municipais.
O proxecto contemplaba incrementar a superficie da zona de xogos desde os 48 metros cadrados ata case 120. Ademais, renovouse o pavimento; incorporáronse elementos como un tobogán, balancíns e bambáns –entre outros– e instalouse un valado de madeira nunha parte do perímetro.
OUTRAS OBRAS REALIZADAS A CARGO DA XUNTA EN CHANTADA
Arias aproveitou a súa presenza para sinalar que no período 2020-2023 o Goberno galego concedeu 137.200 euros ao Concello de Chantada a través dun programa de colaboración cos concellos para a creación e mellora, entre outras cousas, de infraestruturas, instalacións e equipamentos públicos como parques infantís, camiños ou redes de alumeado. Neste senso lembrou a construción de vestiarios no complexo deportivo do parque Eloísa Rivadulla, a colocación de xogos infantís no parque de Sangoñedo e a instalación de pistas de pádel na contorna do pavillón municipal.
