Este evento deportivo e solidario comezará ás 12 do mediodía do día 26 e desenvolverase nun circuíto urbano en Monforte, cun percorrido de 5 quilómetros que terá saída e chegada na Praza da Compañía. A carreira contará con categorías masculina e feminina cun primeiro, segundo e terceiro premio para cada unha.
A inscrición para participar na carreira está aberta ata este venres, 24 de novembro. Pode facerse de xeito online ou no local da asociación. O prezo para a inscrición, que inclúe camiseta, é de 10€, e todos os fondos recadados irán destinados a seguir mellorando a vida dos pacientes con cancro e as súas familias, e a impulsar a investigación oncolóxica para conseguir un 70% de supervivencia no ano 2030. Tamén hai a posibilidade de colaborar cun dorsal solidario para aquelas persoas que non poidan participar na actividade.
A Policía Local colaborará no corte e vixiancia do tráfico daquelas rúas polas que transcorra a carreira, velando tamén pola seguridade dos e das participantes. Neste senso, a carreira implica o corte de vías de comunicación da cidade polas que transcorrerá a carreira: Francisco Moure, Paseo de Lugo, rúa Carude, San Lázaro Reboredo e Dalmiro de la Válgoma, cortes que serán levados a cabo pola policia municipal.
A Concelleira de Muller e Igualdade do Concello de Monforte, Margarita López destacou na presentación que “colaboramos nesta iniciativa poñendo á disposición dos organizadores toda a maquinaria técnica e organizativa necesarias para que a carreira e andaina resulten todo un éxito e estamos seguras de que así será”. Lembrou tamén a colaboración constante do concello de Monforte coa Asociación Española contra o Cancro na provincia de Lugo, cedendo 3 locais para para a atención a enfermos e familiares relacionados con esta enfermidade e colaborando en todas cantas actividades desenvolven na cidade do Cabe.
O Delegado Territorial, Javier Arias, tamén destacou a colaboración coa AECC e lembrou que a Xunta ten en marcha a Estratexia de Xestión do Cancro en Galicia, co obxectivo de reducir a incidencia desta patoloxía e mellorar a atención aos pacientes. Dentro das medidas impulsadas, fixo fincapé nos programas de cribado de cancros como o de mama ou colorrectal; e nos investimentos da Consellería de Sanidade para dotar de alta tecnoloxía os hospitais públicos. Nese sentido, destacou algunhas das actuacións máis recentes no hospital comarcal de Monforte de Lemos, como a incorporación dun novo TAC este mesmo ano ou a recente reforma do hospital de día oncohematolóxico.
