Segundo Pladesapu a día de hoxe o Hospital segue sen un médico Dixestivo propio, xa que a facultativa que ocupaba ese oco está de baixa e non se cubriu con outro médico, vindo de Lugo unha vez á semana a facer colonoscopias e gastroscopias. Esta situación fai que haxa persoas que levan máis dun ano a esperar por unha revisión que non chega. “Cando pase algo, como que alguén sexa diagnosticado tarde por culpa desta demora, ninguén asumirá responsabilidades”, lamenta Pladesapu.
Pladesapu asegura que Rehabilitación segue na mesma situación, despois dun parche temporal de varios rehabilitadores que viñan de Vigo cada sábado pasar consulta “e ben seguro que co que cobraron poderíamos ter un rehabilitador en plantilla todo o ano”, vólvese a estar sen rehabilitador.
Con respecto a Psiquiatría tamén é das grandes esquecidas cunha única psiquiatra, “que está desbordada de traballo, e unhas listas de espera que dan vergonza, o que provoca repetidos ingresos en urxencias de pacientes con patoloxías psiquiatricas, xa que non poden ter un seguemento como é debido”.
A Plataforma destaca tamén o colapso que está a sufrir o Hospital nestes días cos casos de virus respiratorios, “Non é culpa da xerencia o gromo de virus respiratorios, pero si o ter unha atención primaria débil, incapaz de funcionar como debe e filtrar os casos máis leves para que non rematen en urxencias. Ocorreu o que viñemos avisando, unha atención primaria mermada e ineficaz que deriva nunhas urxencias hospitalarias colapsadas, pacientes respiratorios ingresados en camas quirúrxicas e pacientes quirúrxicos ingresados en maternidade, todo sumado á sobrecarga dun persoal que traballa sempre baixo mínimos”.
Nesta situación Pladesapu anima a toda a cidadanía a protesta e a esixir a sanidade pública que lles corresponde, na manifestación convocada en Santiago o día 4 de febreiro por SOS Sanidade Pública.
