Consideran desde Courel Vivo que o municipio é “sistematicamente aldraxado con obras de segunda” e demandan a quen goberne na Xunta na próxima lexislatura, “que se comprometa firmemente co Courel e unha solución áxil para rematar a citada licitación que xa leva 12 meses de retraso”.

Esixen que o municipio poida contar coa súa estrada principal en boas condicións, “Vemos como pasamos de ter unha estrada cun pavimento aceptable a ter un lamazal de terra pola que temos que pasar.”

Lamentan que o concello non dea explicacións nos plenos, “por non ter informacións” e pídenlle ao equipo de goberno que demande da Xunta o necesario para non seguir padecendo esta situación, “vemos como os grandes prexudicados son as empresas, o turismo e a veciñanza”.

Esixen tamén que se realice unha reparación inmediata de todas as fochancas e regos producidos polas obras. Pedindo que a mellora se faga usando asfalto e non “con terra e grava solta que ainda deteriora máis o pavimento e que a circulación sexa perigosa”.