Dentro dos actos litúrxicos da Semana Santa de Chantada destaca a Procesión dos Caladiños, que organiza no Venres Santo a confraría Xesús Nazareno Virxe Dolorosa. Estas dúas imaxes saen ás 21:00 da igrexa nova para percorrer toda a cortorna do casco vello de Chantada. O silencio da procesión só se acompaña do toque de tambor da banda. Na Praza de Santa Ana terá lugar un encontro do Xesús Nazareno coa Virxe Dolorosa.
Esta procesión retomouse no 2001, pero no arquivo parroquial hai datos dunha procesión semellante de hai máis de dous séculos. Por falta de relevo xeracional foise perdendo e a mediados dos anos 60 deixou de celebrarse, aínda que seguiu habendo fervor polas imaxes, pero non saían en procesión.
Arturo Blanco, Confrade Maior, asegura que “estamos moi contentos coa participación. Para levar as andas das imaxes e as propias imaxes que son de madeira de cedro, o peso é bastante importante e somos ao redor de 70 confrades, sempre é importante que haxa relevo que son ao redor de 3 horas de procesión, pero temos relevo e devoción. Despois deste ano, estaremos desexando celebrar o 25 aniversario”.
II FESTIVAL DE CHARANGAS
O vindeiro 30 de marzo Chantada acollerá o II Festival de Charangas. Unha cita que comezaba a celebrarse o ano pasado durante a Semana Santa e que foi todo un éxito, polo que este ano mantense, como explica o concelleiro de Cultura, Manuel Diéguez: “o Festival xorde de conversas coa charanga local que propuxo este tipo de actividade. Comezamos o ano pasado e resultou moi ben. Decidimos facelo nestas datas porque moita xente visita Chantada e queriamos ofrecer unha proposta distinta para todo tipo de público, darlles alegría e festa a veciños e visitantes”.
O evento comezará las 12.30h. co concerto de André Phmollo na rúa Leonardo Rodríguez. Xa pola tarde, actuarán polas rúas da vila as charangas Bicoia, Fuego Street Band, Louband e a charanga local Unión Phenosa, que desenvolverán tamén concertos en diferentes escenarios ata ben entrada a noite.
