Este luns comezaban os campamentos de verán do Concello de Quiroga con máis dun cento de nenos e nenas inscritos. Os participantes foron recibidos na casa da cultura polo Alcalde de Quiroga, José Luis Rivera, e a Concelleira de Educación e Infancia, Maite Pérez Grao, e os monitores.
Despois organizáronse as diferentes clases nas que se distribuíron os nenos e nenas dependendo da súa idade. En total cinco clases repartidas entre as instalacións da Casa da Cultura e o Centro Social.
Os campamentos este ano chegan cargados de novidades. A primeira delas é que os campamentos que se desenvolverán durante os meses de xullo e agosto contan cunha subvención do Plan Corresponsables da Xunta de Galicia solicitada a través do CIM. Esta subvención permite que ademais dos voluntarios se conte con mozos e mozas contratados aos que se lles esixiu titulación relacionada co traballo que van desenvolver.
Outra das novidades é que os campamentos empezan antes. Ás dez da mañá será a hora de entrada, para que ás 10:30 todos os participantes estean incorporados. A hora de remate seguirá sendo as dúas do mediodía nas piscinas municipais.
Campamento de Verán Quiroga / Concello de Quiroga
