Rematado o Festival do Viño da Ribeira Sacra de Monforte, outro gran escaparate de exaltación do viño da D.O. Ribeira Sacra dende hai seis anos, chega o momento de facer valoracións e balances.
José Tomé, Alcalde de Monforte e Presidente da Deputación de Lugo, pronunciouse ao respecto este luns 8 de xullo cualifincando de “éxito rotundo a edicion deste ano en todos os sentidos”. Neste sendo, o rexedor monfortino afirmaba que houbo aumento de visitantes, aumento de vendas de tícekts –as vendas directas nos postos non se valoran– e tamén aumento do número de adegueiros presentes nesta sexta edición. Respecto do público que se achegou ao evento estímase que visitaron o Festival do Viño unhas 20.000 persoas, 5.000 máis que o pasado ano.
No que respecta ao movemento económico nos stands gastronómicos e ás actividades paralelas programadas –viñorutas, concertos, obradoiros infantis, etc– as valoracións confirman tamén, segundo o alcalde, un aumento importante con respecto ás edicións anteriores. Tanto nas catas como nas masterclass, a demanda superou a oferta prevista, feito que leva a pensar en mellorar a demanda deste tipo de actividades.
Finalmente, o rexedor monfortino agradeceu e puxo en valor o compromiso das 34 adegas participantes, a colaboración do Consello Regulador de Ribeira Sacra.
VALORACIÓN DO CONSELLO REGULADOR DA D.O. RIBEIRA SACRA
O Consello Regulador da D.O. Ribeira Sacra tamén considera un ‘éxito rotundo’ a celebración deste encontro cos caldos do territorio amparado, e máis tendo en conta que estiveron presentes un total de 34 adegas representando as cinco subzonas propias da Denominación de Orixe Ribeira Sacra: Amandi, Chantada, Quiroga-Bibei, Ribeiras do Miño e Ribeiras do Sil. Os asistentes puideron degustar unha ampla gama de viños, reflectindo a diversidade e excelencia desta rexión vitivinícola.
O presidente, Antonio Lombardia, tivo un papel destacado durante o evento. No seu discurso inaugural, por exemplo, subliñou o compromiso de viticultores e adegueiros por manter a calidade e autenticidade dos viños da rexión. Na súa intervención, rendeu homenaxe a aqueles que salvaron as viñas do abandono en tempos difíciles, destacando o seu esforzo e dedicación como clave para o rexurdimento e a prosperidade actual da Ribeira Sacra. Tivo tamén palabras para o seu pai, Mario Lombardia, como un deses devotos do viño que axudaron a manter activas as ribeiras do Sil, do Miño e do Cabe cando a denominación de orixe nin sequera era un proxecto. “Queremos seguir levando o nome da Ribeira Sacra a cada recuncho do mundo, respectando as nosas tradicións e o noso entorno natural”, afirmou.
Como remate á valoración, dende o CRDO Ribeira Sacra consideran que o evento tivo un “peche espectacular e unha gran afluencia de público”, engadindo que “a VI Feira do Viño da Ribeira Sacra consolidouse como un dos eventos máis importantes e esperados do calendario vitivinícola en España”.
