A fundación, liderada por Xavier Blanco, un investigador, mestre gaiteiro, artesán e técnico en cultura tradicional, ten como obxectivo principal a difusión e promoción da preservación, conservación, mellora, protección, vixilancia e desenvolvemento da música de raíz.

Xavier Blanco, fundador e herdeiro da sabedoría da saga familiar dos Soledás, leva máis de 40 anos percorrendo vilas e parroquias de Galicia. Durante este tempo, dedicouse a gravar e catalogar un amplo arquivo de documentación relacionada coa nosa cultura tradicional, que inclúe un extenso repertorio de arquivos sonoros, partituras e fotografías recollidas de mestres, músicos e maiores, todos eles portadores dunha tradición transmitida oralmente de xeración en xeración.

A fundación anunciou durante a reunión a inminente inauguración dun centro museográfico de instrumentos de raíz na Aldea Seara, situada nas montañas do Courel. Este centro será un espazo dedicado á preservación e difusión dos instrumentos musicais tradicionais galegos.

Ademais, a Fundación Legar presentou varias das súas actividades culturais que inclúen:

• Aí ven o afiador: unha actividade que pon en valor a figura dos afiadores, oficios tradicionais moi vinculados a esta terra.
• Concertos didácticos de música de raíz: eventos que buscan achegar a música tradicional ás novas xeracións.
• Rutas sonoras: percorridos que permiten descubrir os sons e a música propia de distintas vilas.
• Obradoiros de confección de instrumentos de raíz: talleres prácticos onde se ensina a confección de instrumentos musicais tradicionais.
• Programación para escolares: actividades educativas dirixidas a escolares, co obxectivo de transmitir a cultura e a música tradicional desde idades temperás.

O Concello de San Xoán de Río valora positivamente a colaboración coa Fundación Legar e anima á cidadanía a participar nas actividades propostas, contribuíndo así á preservación e difusión do noso patrimonio cultural.